KALIBO, Aklan–Ginasuportahan ni Christine Hope Pagsuguiron, Sangguniang Kabataan chairperson it barangay Caticlan, Malay ag Aklan SK federation vice president ro ginaproponer nga uman nga ipaiway ro eleksyon para sa mga barangay ag SK officials sa 2024.
Suno kana nga antes pa man ro national and local elections ko Mayo hay nakaangkon eon it signature campaign ag apela ro Liga ng mga Barangay kaibahan ro nagkaeain-eain nga SK chairpersons ag SK federation presidents sa bilog nga Pilipinas nga ipaiway ro nasambit nga eleksyon nga nakataeana kunta sa Disyembre 5, 2022.
Mayoriya suno kana it mga barangay ag SK officil sa aklan hay nagpabor sa nasambit nga proposisyon.
Nagaeaum sigon sanda nga mapamatian ro andang panawagan it manaba ag mataas nga kapueongan it kongreso.
Ginpahayag ni Pagsuguiron nga masyado pang maabu nga problema nga ginapangatubang ro nasyon ag pinaagi sa pag-postpone sa eleksyon hay makatipid ro gobyerno it kapin sa 8-bilyon pesos.
Mag-eowas kara, maabu pang nakapending nga mga programa ag proyekto ro barangay ag SK bangud sa pagtama it pandemya ag election banning.
Mabahoe man sigon ro posibilidad nga ma-divert ro atensyon it local ag national government imbes nga tutukan ro iba pang isyu sa nasyon eabi eon ro mataas nga presyo it produktong petrolyo nga naging resulta sa pagsaka man it inflation.
Madumduman nga 2018 pa ulihing nakaangkon it eleksyon para sa barangay ag SK officials nga nagakahueugan nga na-extend eon it hasta limang dag-on ro andang termino.
