KALIBO, Aklan–Makabig nga dugang nga paeas-anon para sa mga ordinaryong pumueoyo ro ginaproponer nga 10 percent surcharge sa sukot it kuryente it Aklan Electric Cooperative (Akelco) kung indi eagi makabayad it electric bill sa gintaeana nga due date.
Suno kay Azucena Mordeno, sambilog sa member-consumer it Akelco nga masyadong masakit sa buesa ro napueong porsyento nga patong sa electric bill engkaso nga mapas-eawan sa pagbayad sa tamang oras.
Si Mordena hay sambilog sa nagtambong sa dag-unan nga general membership assembly it Akelco sa ABL Sports Complex kahapon, adlaw it Sabado.
Kaeabanan sa rason it mga miyembro-konsumidor it Akelco sa owa eagi pagbayad it electric bill hay ro kawad-an it kwarta eabi pa makaron nga sigidas ro pagtinaas it presyo it mga nagapangunang baeak-eon ag serbisyo.
Sa pihak nga parte, nagpaabot man it andang petisyon ag pagkontra ro grupo it Bagong Alyansang Makabayan ukon Bayan Aklan sa ginaproponer it Akelco nga napueong porsyento nga surcharge sa mga miyembro-konsumidor nga indi makabayad it bill sa kuryente sa tamang oras.
Suno sa grupo nga makabig nga “insensitive” ro nasambit nga tikang it Akelco kung siin dugang raya nga pasakit sa mga pumueoyo nga apektado it inflation.
