KALIBO, Aklan–Gin-anunsyo it Land Transportation Office ukon LTO-Aklan nga ginpaeawig pa it sang buean ro validity it mga nag-expired nga driver’s license, student permit, conductor’s license ukon medical certificate makaron nga buean it Agosto.
Suno kay Engr. Marlon Velez, hepe it LTO-Aklan nga ro dugang nga extension para sa mga motorista hay base sa mandu it andang central office tuga it uman nga pagtaas it kaso it COVID 19 sa nasyon.
Rason nga kon ro mga lisensiya ukon anuman nga requirements nga maga-expire makaron nga buean hay pwede pang ma-renew hasta sa September 30.
Mag-eowas kara, extended man ro rehistro it tanan nga mga motor vehicles.
Ginpahayag ni Engr Velez nga raya hay nagakahueugan nga owa it penalidad nga pagabayaran.
Sa pihak nga parte, gindugang pa ni Engr. Velez nga mas pa nanda nga pagapabaskugon ro pagbantay sa mga daeanon maskin sa tiempo it gabi-i kasunod it mga nagakatabu nga aksidente.
Magiging kabulig nanda sa operasyon ro highway patrol group ag Philippine national police.
Posible sigon nga sa masunod nga domingo hay pagahinyuon nanda ro bulig it regional office bangud sa kakueangan it numero it andang enforcers.
Kaibahan pa sa andang plano ro uman nga pagbuhi sa dating mandato it DILG nga pagbo-oe it mga sabeag sa mga daeanon kaibahan ro natungdan nga ahensiya it gobyerno.
