Mabuhay eon nga nasayuran it mga Melanesian people it Papua New Guinea nga makamandag ro pispis nga Hooded Pitohui apang sa mga western scientists, ko dag-on 1990 eamang natukiban ag natun-an ro angot sa tumaeagsahon nga pispis.
Haeos 32 anyos nga nag research ro ornithologist nga si Jack Dumbacher it mga exotic nga pispis sa Papua New Guinea.
Sambilog sa mga nadakpan nana nga pispis agud nga estudyuhan hay ro Hooded Pitohui.
Sa pagdakop nana kara, gintuka imaw sa anang tudlo ag insigida man nana nga ginsuyop ro nina.
Naisip nana nga bukon it ordinary ro nasambit nga pispis kat makabatyag imaw it pagbinhud sa anang bibig ag dila.
Ko masunod nga mga inadlaw agud nga masiguro ro anang pagduda nga poisonous bird ro Hooded Pitohui, nagbo-oe imaw it baeahibo halin sa pispis ag ginbutang nana raya sa anang bibig.
Napamatud-an nana ro anang pagduda kat nagbalik ro pagbinhud sa anang bibig ag dila.
Ginpadaea ni Jack ro pilang sample it baeahibo it pispis sa National Institutes of Health sa Bethesda Maryland ag idtu nakita nga may Batrachotoxin ro Hooded Pitohui.
Ro Batrachotoxin hay sangka neurotoxic steroidal alkaloids nga may ikasarang nga magtau it pagbinhud ag hapdi sa maisot nga dosage.
Makasarang raya nga magtau it paralysis ag cardiac arrest sa maabuan nga dosage.
Sa makaron hay sangkiri nga pagtuon pa eamang ro ginapatigayon angot sa mga poiso-nous birds.
Mag-eowas sa Hooded Pitohui, ro mga pispis nga natukiban nga may kamandag hay Ifrita birds, European quail, Spoor-winged goose, Hoopees, North American Ruffed grouse, Bronzewings, ag Red warbler.
