KALIBO, Aklan–Nag-abot sa 76 nga mga pribadong eskwelahan ro nagsarado makaron nga school year 2022-2023 sa Western Visayas.
Suno kay Dr. Hernani Escular, Jr. tagapaghambae it Department of Education ukon DepEd Region 6 nga pila sa mga raya hay permanenteng nagsarado samtang ro iba hay temporaryo eamang.
Nagsarado ro mga raya bangud sa padayun nga pagnaba numero it andang mga estudyante kamana man ro pagkalugi tuga it epekto it pandemya nga daea it COVID 19.
Pila sa andang mga estudyante hay nagsaylo sa pampublikong eskwelahan bangud nga indi eon masarangan it andang mga ginikanan nga magbayad it matrikula.
Owa pa sigon sanda it datos sa numero it mga estudyanteng nag-transfer halin sa private schools paagto sa public schools.
Angot kara, ginpasiguro it DepEd ro andang bulig agud nga owa it mga learners nga maapektuhan ag magapadayun gihapon sa andang pagtuon.
