KALIBO, Aklan–Naging maayos ag malinong eon ro pagpanupod it educational financial assistance program makaron nga adlaw it Sabado, Setyembre 3, 2022 sa probinsiya it Aklan.
Raya ro ginpahayag ni Beverly Salazar, provincial link it Department of Social Worker and Development ukon DSWD-Aklan para sa andang ikatlong assessment ag pay-out it educational assistance para sa mga indigent nga estudyante.
Suno kay Salazar nga owa gihapon it ginpasugtan nga walk-ins sa pay-out agud nga malikawan ro gulo.
Padayun man nga nakabantay ro police ag iba pang tawuhan it Local Government Units agud nga masiguro nga maayos ro pila it mga nagabo-oe it ayuda ag agud nga masiguro nga may mga text confirmation eamang ro nakapila.
Ginlimitahan sigon it ahensiya ro numero it text confirmations sa 1,000 sa kada probinsiya.
Makaron nga adlaw hay gintunga sa tatlo ro distribution sites sa Aklan nga ginaeakipan it kalibo nga may 694 samtang ro ibajay hay may 372 ag ro banga hay may una nga 234.
Ro kapin sa 300 nga mga nagpila sa ABL sports complex hay kat mga uman nga ginbalik ko nagtaliwan nga sabado bangud sa kakueangan it mga dokumento samtang ro iba hay nagmasakit.
Ro mga mapas-eawan sigon nga maka-agto sa venue makaron nga adlaw hay pwedeng i-claim ro andang ayuda sa masunod nga sabado, basta nga ipakita eamang ro andang confirmation text ag may balido nga rason.
Pila sa mga dokumento nga ginapangayo hay ro certificate of enrollment ukon school registration ag valid ID.
Ginhinyu man ni Salazar nga kada pamilya hay sangka registration eamang kun sa siin maximum nga tatlong ka unga ro makabaton bangud nga kanugon ro slot nga pwede pa kunta nga maitau sa iba.
