KALIBO, Aklan–Nagpasa it sangka resolution si Sanggunaing bayan member Matt Aaron Guzman nga nagahinyu sa mga telecommunications company nga dugangan ro andang cell site sa banwa it Kalibo.
Raya hay kasunod it mga na-eksperyensyahan nga paghina it signal tuga it mataas nga demand sa data ag internet connection.
Suno kay Guzman, obligasyon it mga telcos nga mataw-an it maayos nga serbisyo ro mga pumueoyo para mapabaskog ro linya it komunikasyon.
Makabig suno kana nga ‘unfair’ sa mga consumer kung mahina ro serbisyo bangud nagabayad sanda it ensakto.
Gintaw-an man kara it punto nga kaparte eon it pagpangabuhi it mga tawo sa modernong panyempo ro paggamit it cellphone para magpatigayun it mga transaksyon.
Dapat eamang sigon nga mabalanse ro demand pinaagi sa pag dugang it cell site bangud masyado eon raya nga congested.
Nagaeaum man ro opisyal nga mataw-an it aksyon it mga telcos ro andang hinyu sa oras nga mabaton eon it mga raya ro kopya it resolution.
