KALIBO, Aklan–Ginpaathag ni Kalibo Sangguniang Bayan member Raymar Rebaldo ro pilang ka mga rason kung ham-an gustong bayluhan ukon amyendahan ni Mayor Juris Sucro ro ordinansa angot sa loan it lokal nga gobyerno.
Suno kay Rebaldo nga natueopangdan nga maabu nga mga butang ro owa nag-agi sa tamang proseso kapareho it pagpatindog it pilang proyekto sa eugta nga ginbakae nga bukon it kaparte it P103 million nga loan it LGU sa Development Bank of the Philippine (DBP).
Kamana man ro tig P1 million nga pondo nga igatao sa kada barangay it Kalibo.
Ro gusto sigon nga pa-amyendahan it alkalde hay ro igapatindog nga quarantine facility para ubrahon nga multi-purpose building.
Posible sigon nga gindali-dali ro pag-apruba kara bangud idtu gintumpok ro pilang pasilidad kapareho it quarantine facility, women’s center ag motorpool sa ginbakae nga eugta sa Brgy. Nalook.
Ginpunto ni Rebaldo nga kung owa pa kunta nabuhinan ro pondo hay pwede pa raya nga ayuson ag i-repackage.
Aminado man ro opisyal nga malisod eon raya nga i-realign bangud naka-award eon it contractor para sa proyekto.
Engkaso sigon nga magkasugot ro Sangguniang Bayan hay posibleng magbalik sa una ro kontrata sa tunga it LGU ag DBP.
