KALIBO, Aklan–Nagakabaeaka makaron si Mr. German Baltazar it Brgy. Nalook sa seguridad it anang pamilya ag maging buong baryo matapos nga nadakpan ro sangka eaeaki nga ginapatihan nga nagamanman kana.
Ginpahayag nana nga pilang adlaw eon nga nagalinahay ro andang waeong bilog nga ayam nga nagalibot sa andang baeay rason nga insigida imaw nga naalerto.
Ginpamatyagan nana it pilang gabi-e hasta nga ko nagtaliwan nga gabi-e hay ana gid nga nadakpan ro eaeaki kabulig ro anang kasimaryo.
Nagapang-edaron sigon raya it 30’s, aklanon maghambae apang medyo may tono it Libacaonon, pangaean eamang ro ginhambae ag uwa it masugid nga apelyido.
Kat ginkutana ro nasambit nga eaeaki hay ginsabat sigon nana nga nagapamasyar eamang imaw sa lugar apang nagalibot raya it bandang alas-8:00 hasta it tungang gabie.
Posible suno kay Baltazar nga imaw gid ro tuyo it nasambit nga eaeaki apang haom sigon imaw sa posibleng matabo.
Gin-imbestigahan it Kalibo PNP ro nasambit nga eaeaki apang uwa it ginsugid nga anumang impormasyon rason nga gilayon man raya nga ginbuhian it mga otoridad.
Si Mr. Baltazar hay miyembro it Sambayanan Partylist ag asosasyon it NAPOCACIA.
