KALIBO, Aklan–Ginkalipay ni Sangguniang Bayan member Matt Aaron Guzman ro resulta it anang mga sakripisyo ag kahugod sa paghimo it mga resolution ag ordinansa matapos nga magpangaywa sa mga top performing nga konsehal sa banwa it Kalibo.
Raya hay matapos nga ginplastar it Sangguniang Bayan it Kalibo ro pilang ka mga programa ag proyekto nga nakabaehag sa executive-legislative agenda sa unang 100 diyas nga pagpanerbisyo it konseho.
Suno kay Guzman, kinahang-ean ro maidid nga pag-research ag paglibot para mahimo ro sangka resolution ukon ordinansa.
Dapat suno kana nga matutukan it mayad ro ginabuytan nga komitiba para maiplastar ro nagakaigo nga solusyon ukon makapangayo it bulig sa national agencies para maipatuman ro pilang programa ag proyekto.
Pila sigon sa anang resolution nga nagtao it significant hay ro streetlight sa national highway.
Raya hay pinaagi sa anang inisyatibo nga makaangayo it pondo kay dating DPWH Secretary ag makaron hay Senador Mark Villar.
Kamana man ro pag-request sa DOST kung siin nakaangkon it bio-reactor ag shredder ro banwa nga makabulig sa pag-decomposed it basura ag ro sangka ordinansa nga makatukod it Animal Bite Center.
Engkaso sigon nga maging operational eon ro nasambit nga edipisyo hay libreng makapakonsulta ro tanan nga indigent nga mga pumueoyo eabi eon ro gin-angkit it mga kasapatan.
