KALIBO, Aklan–Nagapati si Atty. Harry Sucgang, sangka batikang abogado sa Aklan nga maskin nga may puntos ro argumento ni election lawyer Atty. Romulo Macalintal nga naga-kwestiyon sa laye para sa pagpaiway it December 2022 nga barangay elections hay madayun gihapon ro pagpaisoe kara sa Oktubre 2023.
Nasayuran nga ko Lunes, Oktubre 17 hay nagdihon ro beteranong abogado sa Korte Suprema it petisyon nga nagakwestyon sa napirmahang laye.
Suno kay Atty. Sucgang nga nakabaehag sa Konstitusyon nga kada tatlong dag-on hay dapat nga makaangkon it nasambit nga eleksyon.
Maskin ro Kongreso sigon hay gintaw-an it Konstitusyon it gahum nga itaeana ro termino it mga barangay officials, apang owa sanda it kinamatarung nga ma-extend ro eleksyon para kara.
Ro natabu suno kana hay matsa gin-amyendahan it Kongreso ro Konstitusyon nga sangka pag-eabag.
Madumduman nga ginpirmahan ni Pangueong Ferdinand “Bongbong” Marcos Jr. ro Republic Act 11935 para sa postponement it barangay eleksyon nga nakataeana kunta sa Disyembre 5 2022, apang sa ginpirmahan nga laye hay pagahiwaton raya sa masunod nga dag-on.
Nagapati man si Atty Sucgang nga malabo nga maaprubahan it Supreme Court ro petisyon ni Macalintal agud nga malikawan ro gulo.
Ginpahayag dugang nga ro petisyon ni Macalintal hay limitado eamang sa Barangay Elections, ag bukon it kaibahan ro Sangguniang Kabataan nga ginbilog it Kongreso rason nga sanda ro may kinamatarung para kara.
Ro SK suno kana hay owa sa Konstitusyon rason nga maskin anuman ro obrahon kara it Kongreso hay owa eon kita it mahimo.
