KALIBO, Aklan–Ginpasiguro it Department of Social Welfare and Development (DSWD)-Aklan nga haum sanda sa pagtao it ayuda sa mga apektadong pamilya kasunod it pagpanaeasa it bagyong Paeng.
Suno kay Beverly Salazar, Provicial Link it DSWD-Aklan nga naka-preposition eon ro andang mga food packs sa pilang warehouses it probinsya.
Umpisa sigon ko adlaw it Miyerkules hay activated eon ro andang Quick Response Team kung siin tanan nga mga staff hay haum sa pagbulig sa mga lokal nga gobyerno.
Sa kamatuoran suno kana hay naka-release eon sanda it kapin sa 500 nga food pack sa banwa it Libacao, 700 sa Kalibo, 300 sa Numancia ag 500 food pack sa New Washington.
Ginakaeakipan sigon raya it limang kilong bugas, 10 nga de lata, kape ag cerial drinks.
Angot kara, may paeaabuton pa sigon sanda nga kapin sa 3,400 food packs sakay it daywang ka mga wing van nga igabutang sa Aklan State University (ASU) main campus kung siin nakabutang ro andang warehouse.
