KALIBO, Aklan–Gin-insister ni Kalibo Sangguniang Bayan member Augusto Tolentino nga responsibilidad it Kalibo PNP nga magpatigayun it regular nga pagmonitor sa daeagan it operasyon it daywang ka mga peryahan sa banwa.
Raya hay kasunod it mga nabaton nga report nga may nagakatabo nga illegal gambling sa sueod it peryahan.
Indi sigon pwede nga irason it mga kapulisan nga owa tagreklamo bangud kaibahan sa andang obligasyon ro monitoring para masiguro nga owa it nagakatabo nga anumang krimen ukon pag-eabag.
Dapat man sigon nga usisaon it alkalde ag mismong nag-release it permit ro operasyon it peryahan para masiguro nga raya hay nagasunod sa polisiya.
Gintaw-an it punto ni Tolentino nga bukon it iligal ro pagtukod it peryahan basta nga purong “entertainment” eamang ro operasyon kara ag owa it eakip nga pagsugae.
Ro desinyo sigon it peryahan hay magtao it kasadya ag kalingawan sa mga pumueoyo.
Sa kada hampang sigon nga ginapatigayun hay kinahang-ean nga magbakae it ticket bilang taya kung siin ro mga magadaog hay pagataw-an it papremyo nga pagkaon ukon gamit sa baeay ag bukon it kwarta.
Ro anuman sigon nga porma it hampang nga may premyong kwarta hay makabig nga sugae ag iligal.
