KALIBO, Aklan–Naglunsar it Rabies Awareness Program ag Rabies Literacy Health Program ro Aklan Medical Society kaibahan ro Office of the Provincial Veterinarian, Aklan State University (ASU) School of Veterinary Medicine ag Maharlikan Center makaron nga adlaw sa covered court it Kalibo Pastrana Park.
Suno kay Dr. Glenford Refre, Presidente it Aklan Medical Society nga tuyo it aktibidad nga i-empower ro mga pumueoyo angot sa rabies prevention ag libreng pagbakuna sa mga alagang ayam.
Raya sigon hay bukas sa tanan kung siin kinahang-ean eamang nga daehon it kada pet owner ro andang alagang ayam sa venue para pabakunahan.
Mag-euwas sa pagtao it libreng anti-rabies vaccine, may igalunsar man sanda nga dog show bandang ala-1:00 it hapon kung siin ro registration fee hay P200.
Pila sa mga premyo nga sarang mai-uli it mga magapasakop hay ro vitamins, dog food, cash prize, certificate ag plaque of recognition.
May kaangtanan kara, game nga game man nga nagpa-rehistro sa dog show ro pet owner nga si Shan kyle Villar kaibahan ro anang pitong buean nga alagang si Happy.
Eubos sigon ro anang kalipay bangud raya ro unang kahigayunan nga magapasakop sanda sa dog show.
Gusto eamang sigon nana nga mag-enjoy si Happy kaibahan ro iba pang mga ayam nga nagpasakop.
