Sangka resolusyon ro ginaduso makaron sa sangguniang bayan it Kalibo.
Raya hay bilang pagsuporta man sa resolusyon nga ginproponer it sangguniang panlalawigan it Aklan angot sa hugot nga pag-oponer sa planong pagbaton it international flight sa Caticlan Airport.
Suno kay Kalibo vice mayor Cynthia Dela Cruz, magiging risgo sa kaeowasan it mga byahero engkaso nga magbaton it international flight ro nasambit nga paeoparan bangud nga matag-od ro runway kara ag desinyo eamang para sa domestic flights.
Kueang sanda sa pasilidad ag uwa it opisina ro bureau of immigration.
Mag-eowas kara, mabahoe man ro magiging epekto kara sa ekonomiya it probinsya it Aklan eabi eon sa pangabuhian it mga pumueoyo.
Magahina ro kita it mga saeakyan, mga vendors nga nagabaligya it lokal nga produkto ag sa iba pang sektor.
Partikular suno kana nga mawad-an it kita ro mga hotels sa banwa it Kalibo ag ro iba pang kabanwahanan nga pagaagyan it mga turista paadto sa isla it Boracay.
Mabahoe eon sigon ro ginkapital it gobyerno probinsyal nga maging international airport ro paeoparan sa Kalibo.
