Nabatyagan eon makaron ro epekto sa Kalibo International Airport sa sigidas nga paghugpa it mga domestic flights sa Caticlan Airport.
Suno kay Kalibo sangguniang bayan member Ronald Marte, sambilog sa mga author it resolusyon nga nagasuporta sa tikang it gobyerno probinsyal sa pag-oponer nga makaangkon it international flights sa nasambit nga paeoparan nga kapin sa 35 flights kada adlaw ro nagahugpa sa Caticlan airport samantalang ap-at ka mga flight eamang ro ginaakomodar sa paeoparan it Kalibo.
Nagakadapat suno kana ro tikang nga ginhimo it gobyerno probinsyal nga pag-oponer sa plano it pribadong sektor bangud nga madueaan it income ro probinsya.
Mabahoe suno kana ro naging investment sa Kalibo International Aiport ag inde nanda pagpasugtan nga mauyang ro tanan nga ginpangabudlayan it gobyerno.
Mag-eowas kara, nagareklamo eon ro mga hotels and restaurant sa nasambit nga paeoparan bangud sa kawad-an it customers ag kliyente bangud sa sangkiri nga pasahero nga nagaagi sa KIA.
