Nag-umpisa eon sa paglatag it andang baligya nga mga paeopok sa gintaeana kanda nga lugar ro pila ka mga firecrackers vendor sa Brgy. Panayakan, Tangalan.
Suno kay Renir Canillas, gin-umpisahan eon nanda ro pagbaligya agud nga mabawi ro andang ginastos sa pagproseso it dokumento agud nga maging legal ro andang pagnegosyo.
Nagaabot sigon sa P7,000 pesos ro andang gastos rason nga kon kumita sanda it P5,000 pesos hay inde eon raya kabalik sa andang kapital.
Ginpahayag dugang nga ro andang supply hay naghalin pa sa Bulacan kon sa siin nataeopangdan ro pagtaas sa presyo it mga nakaangdan nga paeopok kaparehas it kwitis, roman candle, higad, fountain ag iba pa nga haeos P20 pesos ro gintaas sa presyo kara.
Nagata-o sigon sanda it bulto sa mga bumaeakae sa discounted nga presyo bangud nga inde man kinahang-ean nga mag ginansya it sobra ro importante sigon hay may kitaon eamang sanda maskin papaano nga makasuporta man sa andang kinahang-eanon eabi eon sa selebrasyon it bag-ong dag-on.
Suno pa kay Canillas, hugot nanda nga ginasunod ro mga sueondanan nga ginapatuman it PNP ag BFP agud nga malikawan ro pila ka mga insidente sa andang lugar nga ginaeauman nga pagadagsaon it mga bumaeakae sa bisperas it okasyon.
