Ginapa-imbestigahan makaron it Commission on Human Rights ro kapin sa 40 drug related death nga nailista sa nasyon sa idaeom it administrasyong Marcos Jr.
Raya hay matapos nga una eon nga ginpahayag it Philippine National Police nga nakalista sanda it kapin sa 46 drug related death sa tunga it andang ginapatigayon nga anti-illegal drug operations sa Pilipinas umpisa Hulyo 1 hasta Nobyembre 7, 2022.
Suno kay Commission on Human Rights commissioner Beda Epres, sa makaron hay nakasumite eon sanda it sueat sa taeatapan ni Philippine National Police chief PGen. Rodolfo Azurin Jr. para tan-awon ro mga impormasyon it mga namatay sa war on drugs it presenteng administrasyon.
Tuyo kara nga tan-awon ag maid-id nga imbestigahan kung sin-o ag ano ro mga naging rason it kamatayon it mga nasambit nga biktima.
Sa pihak kara, ginklaru man ni Epres nga hasta sa presente hay nagapabilin nga satisfied ro CHR sa nagiging performance it PNP kadungan sa gihapon it gina-insister sa kahaegahan nga maimbestigahan ro mga kaso it pagkamatay it pilang mga indibidwal nga may kaangtanan sa illegal nga droga.
Samtang, kung madumduman, una eon nga ginpaathag ni PNP chief Azurin nga maghalin sa 46 nga mga drug related death sa nasyon, 32 kara ro namatay sa tunga it mga ginpatigayon nga operasyon it pambansang pulisya, samtang ro nabilin nga 14 mat-a hay napatay it mga tawohan sa Philippine Drug Enforcement Agency.
Sa pihak nga parte, kasunod man kara hay ro pag-insister it hepe it pambansang pulisya nga nakaangkon eon it pagbag-o pag-abot sa istratehiya makaron it bilog nga kapulisan kumpara sa dating istratehiya kara ko panyempo it administrasyon ni dating Pangueong Rodrigo Roa Duterte.
