Namatay samtang ginabueong sa sangka ospital sa banwa it Kalibo ro sangka senior citizen matapos nga aksidenteng sumunggab ro anang ginamaneho nga motorsiklo sa kotse nga nag-eontad sa national highway nga sakop it Brgy. Laguinbanua East, Numancia.
Ginkilaea it Numancia Municipal Police Station ro biktima nga si Marcelo Pelingon, 69-anyos ag residente it Brgy. Tamalagon, Tangalan.
Samtang, ginkilaea man ro driver it kotse nga si Rodolfo Laurente, 65-anyos ag residente it Brgy. Laguinbanua West.
Sa inisyal nga imbestigasyon it pulisya, parehong direksyon ro ginabaybay it daywang behikulo kon sa siin kat hana eon nga magaliko ro kotse hay aksidente nga sumunggab ro motorsiklo.
Bangud sa impact it pagkasunggab hay umawas si Pelingon sa anang motorsiklo ag nakaangkon it fatal nga lastro sa ueo nga gintunaan it anang hinali nga kamatayon.
Ro nasambit nga aksidente hay padayon pang ginaimbestigasyon it Numancia PNP para sa nagakaigong disposisyon.
