Agud nga mapabilin nga malimpyo ro banwa it Kalibo partikular sa festival zone area nga inde maapektuhan ro koleksyon it basura, ginpakamayad it solid waste management nga bag-uhon ro schedule it pagkolekta it basura.
Suno kay Adorada Reynaldo, public service officer III it LGU Kalibo nga kada dag-on hay nagabag-o ro schedule sa pagkolekta it basura kon sa siin umpisa sa Enero 10 hasta it 15 hay igapatigayon ro garbage collection it alas-12:00 it tungang gabie hasta it alas-5:00 it aga-aga.
Angot kara, panugyan ni Reynaldo sa mga residente eabi eon sa sueod it festival zone area nga antes pa man sanda magkatueog hay ipaguwa eagi ro andang mga garbage bag ukon magbugtaw sanda it aga-aga para sa pag-agi it garbage truck hay makolekta ro mga raya.
Ginpaathag ni Reynaldo nga inde eon sigon makasueod ro garbage truck oras nga masaraduhan eon it mga kapulisan ro entry point bangud nga ginsikyar nanda ro lugar.
Sa pihak kara, nagapabilin sa dating oras ro pagkolekta it basura sa Kalibo public market bangud nga bukon raya it apektado sa selebrasyon it Kalibo Ati-Atihan Festival.
Samtang, pag-abot sigon sa mga plea market hay may nakataeana nga lugar para kanda nga butangan it andang mga basura agud nga idto boe-on it garbage collector.
