Pila sa mga online shop sa China ro napabalita nga ro mga kaeaeakin-an ro ginapa-model it women’s lingerie agud nga makaeusot sa mga patakaran it andang gobyerno!
Mabahoe nga industriya makaron ro livestreaming sa China.
Kaabuan sa mga business idtu hay nagakita it mabahoe sa live selling it andang mga produkto.
Apang ko nagtaliwan nga mga dag-on, nagpaguwa ro Chinese government it mga hugut nga rules and guidelines sa kun ano ro pwede ag bawae nga ipaguwa sa livestreaming.
Ro maga-eabag kara hay indi eon makabukas it account sa maskin anong livestreaming websites.
Sambilog sa mga ginabawae nga ipaguwa sa livestreaming hay ro mga babaye nga nakasuksok it sexy nga pang-eambong kapareho it swimsuit, underwear ag lingerie.
Bangud kara, naghina ro pagbaligya it mga underwear ag lingerie online.
Bukon sigon it madahog kon sa mannequin eang nakasuksok ro lingerie nga ginabaligya sa live selling.
Agud nga makaeusot sa laye, naisipan it sangka underwear ag lingerie company nga mga eaeaki eon lang ro magmodel it andang mga produkto.
Bangud nga owa man it laye nga bawae nga magsuksok it lingerie ro sangka eaeaki, owa ginsita ro lingerie company.
Naging madahog ro live selling it lingerie company ag nagsueunud man ro ibang kompanya ag naggamit man sanda it male models agud nga magbaligya it underwear ag lingerie.
Maabung netizens ro nalibang sa naisip nga loophole ngara it mga lingerie live sellers apang ginaeauman eon nanda nga magahimo it bag-ong laye ro Chinese government agud nga raya hay ibawae.
