Makabig nga owa it pinagkaiba sa Pilipinas ro pamaagi it mga Chinese sa pagselebrar it bag-ong dag-on.
Raya ro ginpahayag ni Bombo International Correspondent Epifania Paclibar nga presenteng nagatrabaho sa Beijing, China.
Pareho sa mga pinoy kada pagsugaeaw it bag-ong dag-on, raya man sigon ro tyempo it pagtieipon it mga magkapamilya ag dueungan nga nagakaon sa andang mga panimaeay.
Sa pagselebrar sigon it bag-ong dag-on sa China hay indi gid maduea ro pagpahaom it mga tradisyonal nga handa kapareho it mapilit nga pagkaon partikular ro tikoy, pagtipon it mga nagakaeain-eain nga bilog nga prutas ag mga matam-is nga pagkaon.
Ginpahayag dugang pa kara nga matsa magkapareho eamang ro tradisyon ag kultura it mga Chinese sa mga Pinoy sa pag sugaeaw it bag-ong da-on apang mas maabo eamang sigon nga pamahiin ro mga Chinese.
Sa pihak nga parte , bangud sa daywang dominggo nga mahaba-habang bakasyon ro ginapatigayon sa nasyon, punu-an sigon ro mga pampublikong transportasyon bangud sa naga-ueoli man sa andang mga lugar ro mga presenteng nagatrabaho sa Beijing.
Maabo sigon ro mga nagabakasyon ag nagawarang sa mga pampublikong parke sa bilog nga China.
Samtang, apisar it mataas nga kaso it COVID-19 sa nasyon ginatinguhaan gid sigon it mga tsino ro pagpreparar it bongga nga selebrasyon para sa nasambit nga okasyon.
