Todo man ro suporta nga igatao it taeatapan it edukasyon sa ginadihon nga mga hagna nga tuyong magtao it dugang nga benepisyo ag insentibo sa mga teaching and non-teaching personnel sa pampublikong eskwelahan sa nasyon.
Sa pahayag ni Mr Earl Losito, supervising administrative officer it Department of Education (DepEd), sa virtual meeting it committee on civil service, government reorganization, and professional regulation sa pagpanguna ni Senator Ramon Bong Revilla Jr., positibo ro anang sabat angot sa pagtao sa mga manugturo it mga nagakaigo nga benepisyo ag insentibo ag nagapati man imaw nga ro mga non teaching personnel hay may mabahoe nga papel sa pagsuporta ag pag-umwad it mga manugturo.
Samtang, ginpahayag man ni Losito tag kasagsagan pa sigon it pandemya nga padayon ro andang ginatao nga suporta sa mga manugturo.
Mag-eowas sa cash allowance hay nagtao eon sigon sanda it special hardship allowance, raya hay additional compensation nga ginatao sa mga manugturo kung siin sanda hay exposed sa kalisod it trabaho.
Ginpasiguro man ni Revilla nga pagahimuon it mga mamalidha rong tanan nga masarangan para “ma-institutionalize” ro teaching supply ukon “Chalk” allowance para sa mga manugturo, nga andang ginsuhesiyon eon nga igataas sa P10,000 maghalin sa dating P5,000.
Gin-insister man it mamalidha nga ro goal hay maipatuman ro nasambit nga allowance para masiguro nga ro mga manugturo sa mga pampublikong eskwelahan hay permanenteng makabaton kara ag bukon eamang it special provision sa national budget.
