Kapin sa P5 milyon pesos ro nakataeana nga pondo sa Banga-Libacao provincial road para sa pagahimuon nga re-blocking ag rehabilitasyon it karsada sa raya nga dag-on 2023.
Suno kay Engr. Noriel Macavinta, head it maintenance division it Provincial Engineering’s Office nga abu pat-a ro andang nga oeobrahan sa nasambit nga karsadahon kon sa siin ro temporaryo nanda nga remedyo hay ginabaeasan ro mga buho-buho nga karsada para inde maeosot ro mga motorista.
Bangud sa permi nga pag-inuean hay inde sanda makapatigayon it re-blocking bangud nga posibleng magalala pa ro mga kasamaran ag base may mga madisgrasya rason nga ginahueat man nanda nga magmaayad-ayad ro tyempo agud nga makapadayon sa andang trabaho.
Plano nanda nga magbutang it cross drainage agud nga inde magpunpon ro tubi sa mismong karsada ag kapin eon sigon sa 1 feet ro damoe kara.
Samtang, ginklaro ni Engr. Macavinta nga hasta eon lang sa pagbantay ro Bantay Kalikasan bangud nga inde man nanda masayuran kon pila ro bug-at nga karga it mga dump truck nga nagahakot it gravel and sand maghalin sa quarry site bangud nga uwa sanda it pangsukat.
Samtang sa pihak nga parte, nagpangayo man it pasaylo si Engr. Macavinta sa mga motorista bangud sa perwisyo nga hatod it samad nga karsadahon.
Ginpasiguro man nana nga magapadayon ro andang trabaho ag himuon ro andang ikasarang para mataw-an it komportableng daean ro mga byahero.
