Naka-alerto ro bilog nga pwersa it pulisya ag iba pang multi-agency personnel agud siguraduhon ro kaeowasan it mga delegado nga presenteng idto sa isla it Boracay sa pag-umpisa makaron nga adlaw it Association of Southeast Asian Nations (ASEAN) 3rd Digital Ministers Meeting (ADGMIN) ag ASEAN Digital Senior Officials (ADGSOM).
Sa interview it Bombo Radyo kay PSSgt. Jane Vega, tagapaghambae it Aklan Police Provincial Office (APPO), ginatos nga uniformed police personnel ag iba pang security forces ro nakadeploy sa isla ag maging sa mainland Malay agud sikyaron ro seguridad it kapin sa 150 international visitors halin sa napueong ASEAN member states nga ginakaeakipan it Laos, Indonesia, Philippines, Singapore, Cambodia, Malaysia, Myanmar, Viet Nam, Brunei Darussalam, Thailand ag dialogue partners nga United Kingdom, India, Australia, China, Japan, US, New Zealand, Canada, EU, Republic of Korea ag Russia nga ginaeaumang magatambong man sa nasambit nga international event.
Confident sigon sanda nga magampanan ro andang obligasyon kon sa siin mabahoe ro pagsalig it organizers sa andang serbisyo eabi eon sa kapulisan it probinsya it Aklan.
Samtang, nakalatag eon man ro mga floating asset personnel it Philippine Coastguard Aklan sa kaeawran it isla, sa mga shoreline, border checkpoint sa Caticlan airport, Caticlan ag Cagban ports agud umalalay sa security forces.
Sa makaron suno kay Senior Chief Petty Officer Dominador Salvino it PCG Aklan hay uwa man sanda it namonitor nga anumang paeag nga posibleng umagi sa entry ag exit point sa kaeawran it isla nga makabulabog sa mabahoe nga event nga igapatigayon sa Boracay nga magaumpisa makaron nga adlaw it Lunes, Pebrero 6 ag magatapos sa Pebrero 10, 2023.
Ro nasambitang event hay pagapangunahan it Department of Information and Communications Technology (DICT) nga may temang “Synergy Towards a Sustainable Digital Future” nga tuyong pabaskugon ro digital skills ag digital transformation it mga ASEAN member states sa nasambitang mga nasyon
