Ginpasiguro it Commission on Elections (Comelec) nga padayun ro pagpatigayon it barangay ag Sangguniang Kabataan elections sa maabot nga Oktubre.
Tiempo eon agud nga raya hay pagahimuon.
Pilang dag-on eon man nga nakapungko sa puwesto ro mga nagaserbisyo bangud nga makapilang beses eon raya nga napaiway.
Ro ulihing barangay ag SK elections hay ginpatigayon kato pang Mayo 2018.
Sa kabuhay it tiempo nga pagpanerbisyo, okey eang kon medyu abu nga gin obra ag owa nagging pabaya ro presenting nakapungko nga opisyal .
Ro masubo sa kabuhay it tiempo it pagpanerbisyo owa it natabu nga pagbag-o.
Ag posibleng ro iba hay mabuhay nga tiempo eon nga nagahimo it mga ilegal nga bueuhaton.
Samtang nagahilapit ro eleksyon, nauna eon nga ginhangkat ni Manila Police District director Brig. Gen. Andre Dizon ro mga magakandidato sa eleksyon nga magpaidaeum sa drug test para maipakita nga malimpyo sanda sa ilegal nga droga.
Sa Manila hay may gina monitor ro pulisya nga daywang brgy. chairman ag 20 nga kagawad bangud sa pagduda nga daeahig sa ilegal nga droga.
Mabuhay eon nga ginadebatehan kon dapat baea nga maging requirement sa pagpadaeagan sa eleksyon ro pagpaidaeum sa drug test, nga owa man gin aprubahan.
Maskin nga mabahoe nga porsiyento eon it barangay sa nasyon ro nalimpyuhan sa ilegal nga droga, apang may nabilin pang pilang barangay ro owa pa nadeklarang drug free
Sangka mabahoe raya nga pangutana bangud nga maskin nga ro barangay ro pinakamaisot nga komunidad nga madaling mabantayan ag ro mga nakapungkong opisyal ro ginaeauman nga dapat nga magbantay.
