Nagapadayon ro hugot nga seguridad sa isla it Boracay kasunod sa pag-extend sa aktibidad it Association of Southeast Asian Nations (ASEAN) 3rd Digital Ministers Meeting (ADGMIN) ag ASEAN Digital Senior Officials (ADGSOM) sa isla it Boracay kon sa siin magatapos pa raya sa Pebrero 12.
Suno kay Punong Barangay Nixon Sualog it Manoc-Manoc, Boracay nga sambilog sanda sa namanduan nga magsikyar sa palibot it mga lugar nga ginahiwatan it meeting.
Kapin sa 150 international delegates maghalin sa mga ASEAN member states ro nagtambong sa mga nagkaeain-eain nga aktibidad nga nagapadayon sa mga daeagkuan nga hotel and resorts sa nasambit nga isla.
Haeos 400 man ro gintaeana nga PNP uniformed police ag Philippine Army mag-eowas pa sa ibang force multipliers ro nakabantay sa seguridad sa isla ag mainland Malay.
Ginpahayag dugang ni Sualog nga smooth ro daeagan it aktibidad sa isla sa koordinasyon man sa lokal nga gobyerno ag provincial government eabi eon makaron nga ginsabayan pa raya it pagbuhos it mga dumueoong ag lokal nga turista.
Pagkatapos suno kana it aktibidad it mga delegasyon eabi eon sa gabi-e hay nagaguwa ro mga raya ag nagalibot sa isla kaibahan ro mga nakabantay nga miyembro it Philippine Army ag Philippine National Police ukon PNP.
Sa makaron suno kana hay haeos tanan nga ginaekspektar nga representante it mga ASEAN nations hay nakaabot eon sa isla ag ro ulihi nga abot hay sanda man ro ulihi nga magauli sa Pebrero 12.
