Kapin sa 4,227 ro bakanteng slot para sa probinsya it Aklan sa madugang sa listahan it Pantawid Pamilyang Pilipino Program ukon 4P’s kasunod it pagtapos sa programa it mga benepisyaryo nga bukon eon it makabig nga kubos.
Apang, ginpaathag ni Mr. Stephen Suajico Jr., OIC 4P’s provincial link nga kabilugang 6,159 ro presenteng ginavalidate it ahensya nga una makaron sa listahan nga makabig nga pontential beneficiaries.
May kaangtanan kara, igaprayoridad suno kana ro eubus nga nagakinahang-ean base sa mga guidelines nga nakabaehag sa memorandum maghalin sa andang national office.
Ginpaathag dugang ni Suajico nga ro inde makasueod sa unang batch it mga benepisyaryo hay magahueat ro mga raya sa masunod nga kahigayunan nga may magatapos man sa nasambit nga programa.
Nasayuran nga ro nasambit nga programa it gobyerno hay nakasentro sa pagpaumwad it pagpangabuhi it sangka pamilya kon sa siin ro andang ayuda nga ginabaton hay para sa andang pagkaon, edukasyon it mga inonga ag ikaayong eawas.
