Bukon it kumbinsido ro grupong Philippine Coalition for the International Criminal Court sa naging pahayag ni Pangueong Ferdinand “Bongbong” Marcos Jr. nga magiging hangkat sa soberanya it Pilipinas ro pagpadayon it imbestigasyon it International Criminal Court sa drug-related death ko tyempo it administrasyong Duterte.
Suno kay Atty. Ray Paolo Santiago, bukon sigon it “accurate” ro naging pahayag it pangueo bangud bilang sambilog sigon sa mga miyembro it International Criminal Court hay otomatiko nga ginabaton it sangka nasyon ro hurisdiksyon it nasambit nga International chamber.
Paathag kara, kaibahan sigon sa commitment it Pilipinas kat ginbaton kato ro hurisdiksyon it ICC hay ro padayon nga pakigbuligan sa kooperasyon hasta it may una pang nagahueat nga proceeding sa withdrawal it Pilipinas maghalin sa pagpasakop kara sa ICC.
Dugang pa it coalition, kung gusto it gobyerno nga punduhon eon it ICC ro pag-iimbestiga sa drug war sa nasyon hay kinahangean nga ipakita kara ro pagpatigayon it minatuod nga imbestigasyon angot sa 7,000 kaso it drug related cases nga nagsukoe sigon kat kasagsagan it war on drugs campaign it Duterte Administration.
Madumduman nga ko nagtaliwan nga dag-on 2019 hay ginkakas ni dating Pangueong Rodrigo Duterte ro Pilipinas maghalin sa Hague-based tribunal makataliwan ro sang dag-on kat mag-umpisa ro ICC sa andang preliminary investigation sa anang ginpa-iral nga war on drugs campaign sa Pilipinas.
