Aprubado eon it mga miyembro it Sangguniang Bayan it Kalibo ro sangka resolution nga magatao it hands on agritech demo sa mga senior citizen ag persons with disability ukon PWD sa idaeom it Municipal Agriculture Office.
Suno kay Kalibo Sangguniang Bayan Member Agusto Tolentino nga tuyo karang mataw-an it kahigayunan ro mga senior citizen ag PWD sa banwa it Kalibo nga makaangkon it mga nagakaigo nga kasayuran angot sa pagpananom ukon gardening it mga tinuean-on.
Magapaidaeom sigon ro mga kwalipikadong benepisyaryo sa mga training nga igapatigayon it municipal agriculturist.
Angot kara, pagataw-an man sanda it mga busoe it tinuea-on para andang pagatatapon it tanom.
Sa pihak nga parte, ginaduso man ni Tolentino nga maigapatuman ro RA 10070 ukon ro pagmandu nga magkriar it persons with disability affair sa mga municipalidad.
May naga eksister eon sigon nga opisina sa banwa it Kalibo apang kueang sa tinawo.
Tuyo sigon kara nga mataw-an it opisina ro mga PWD nga may masapuean sa tyempo nga sanda hay may gina-angkon nga problema.
