Nagapati si House Committee on Economic Affairs Vice Chairperson ag Aklan 2nd District Rep. Teodorico Haresco Jr. nga kinahang-ean it probinsya ro mga investors ukon negosyante nga nagahueag ag nagabutang it kwarta.
May ideya, passion ag commitment nga mapasanyog ag mapaumwad ro ekonomiya it probinsya it Aklan.
Raya ro nagapangunang katuyuan it kongresista sa ginaduso nga hagna nga House Bill 7032 ukon ro pagtukod it West Aklan Special Economic Zone Authority ukon WASEZA.
Naga-eaum ro opisyal nga maapruban it House Ways and Means committee ro anang hagna hasta sa committee on approriations.
Apang, ginklaro ni Haresco nga mahaba-haba pang proseso ro pagaagyan it nasambit nga hagna.
Engkaso nga madayon, magata-o sigon raya it maabong trabaho eabi eon sa banwa it Tangalan, Ibajay ag Malay sakop eon ro isla it Boracay bangud nga raya ro sakop nga mga munisipalidad sa ginakriar nga WASEZA.
Ginatantya it kongresista nga kapin sa P6 bilyon pesos ro maduea nga pondo sa national government engkaso nga matukod eon ro WASEZA bangud nga posibleng ro nasambit nga kantidad ro igataeana sa raya nga taeatapan.
