Uman nga nag-apela sa lokal nga gobyerno it Kalibo ro sangka vendor it baboy sa banwa it Kalibo nga mataw-an it win-win solution matapos nga uwa imaw naka-renew it anang mayor’s permit bangud sa mabahoe nga baeayran.
Suno kay Martin Capistrano, nagtapos eon ro extension nga ginta-o kanda it LGU kon sa siin striktong ginpatuman makaron ro “no mayor’s permit, no katay policy” sa slaughter house.
Raya hay agud nga ibutang sa legal nga proseso ro tanan nga transaksyon sa slaughter house kasunod it pila ka mga reklamo it mga negosyante sa Kalibo public market nga nataeopangdan it mga raya nga maabo ro nagapakatay nga uwa it legal permit.
Kapin sa P200,000 pesos sigon ro anang baeayran sa LGU ag kinahang-ean nga maimpas raya antes nga marenew ro anang permit nga sa sueod it ap-at nga dag-on nga uwa nana narenew.
Nagahinyo imaw sa alkalde it banwa nga kon pwede hay mataw-an imaw it tyansa nga maskin mahueog-hueagan ro anang kompromiso.
Sa makaron suno kana hay kapin sa daywang adlaw eon nga uwa imaw it ginanegosyo bangud sa kawad-an it karne it baboy nga inugbaligya bangud nga uwa imaw it ginapakatay.
