Nagaabot eon sa P5.9 milyon pesos ro ginatantyang danyos sa pangabuhian it mga pumueoyo nga sakop it banwa it Caluya, Antique.
Raya hay kasunod it maeapnagong oil spill halin sa nag-eogdang nga MT Princess Empress sa Naujan, Oriental Mindoro.
Suno kay Broderick Gayuna Train, head it Provincial Disaster Risk Reduction Management Council ukon PDRRMC Antique nga gulpyadang nadueaan it pangabuhian ro mga residente bangud nga ginabawaean eon nga magpangisda sa kaeawran nga apektado it oil spill.
Agud nga ma-contain ro pagkalhit kara sa mga kaeapit pa gid nga isla hay nagbutang sanda it improvised oil spill boom nga ginkabuligan nga himuon bangud nga ro tatlong barangay nga eubus nga naapektuhan hay nadugangan eon bangud sa madasig nga pagkalhit it langis sa kaeawran.
Mag-eowas kara, kapin sa napueong ka pamilya sigon ro ginbakwit nanda sa evacuation center halin sa 7,198 families ukon 22,000 indibidwals nga apektado bangud sa peligro sa andang ikaayong eawas daea it masangsang nga hugom it langis.
Ginpahayag dugang ni Train nga magadeploy it personnel ro Provincial Health Office agud nga ma-assess ro ikaayong eawas it mga residente.
Nag-umpisa eon man nga magpanupod it relief assistance ro Department of Social Welfare and Development bangud nga temporaryong nawad-an it pangitan-an ro mga pumueoyo.
