Ginklaro it Philippine Statistic Authority ukon PSA Aklan nga ro mga tawo nga nagalibot-libot sa banwa it Malay nga nagapangayo sigon it national identification card it mga residente nga ginabayaran nanda it P60 pesos hay bukon it tawuhan it PSA.
Ginpaathag ni Engr. Antonette Catubuan, Chief Statistical Specialist it PSA-Aklan nga ro andang aktibidad sa nasambit nga banwa hay puro eamang naangot sa pagparehistro sa Philippine Identication Sytem ukon PhilSys kadungan sa pagpanupod it soft copy ukon e-Phil ID kara sa mga uwa pa nakaabot ro andang national identification card.
Mag-eowas kara, may anda nga community base monitoring system ukon CBMS nga ginapatigayon it kada lokal nga gobyerno kon sa siin nagalibot ro andang tawuhan sa kada panimaeay ag ginausisa ro kada tawo kamana man ginakutana kon nakaparehistro eon sanda sa PhilSys.
Ro mga nakabaton eon it national ID hay ginakumpara sigon nanda raya sa andang natipon nga datos kon nagakasinanto apang uwa sigon sanda it ginatanyag nga kantidad kaparehas sa ginareport nga P60 pesos bangud nga bukon raya it sakop sa andang trabaho.
Ginklaro dugang ni Catubuan nga uwa nakipagbahin sa nasambit nga programa ro LGU Malay.
Angot kara, panawagan nana sa publiko sa banwa it Malay nga kon may mataeopangdan nga nagahimo it kaparehas kara nga aktibidad hay insigidang ireport sa taeatapan it pulisya para sa nagakaigong aksyon.
