Nagapati si Pangueong Bongbong Marcos nga mas pang magabaskog ro depensa it nasyon sa cyberspace kasunod it pagpirma it memorandum of understanding sa tunga it National Intelligence Coordinating Agency (NICA) ag National Grid Corporation of the Philippines.
Ro pagpirma sa nasambit nga kasugtanan hay ginpangunahan nanday NICA chief Director General Ricardo De Leon ag NGCP President ag CEO Anthony Alameda nga personal nga ginsaksihan it Pangueo nga ginhiwat sa Palasyo it Malacanang.
Gin-insister man it Pangueong Marcos nga importante ro nasambit nga tikang para maprotektahan ro cyberspace ag mabaeabagan ro anumang cyberspace attacks eabi eon sa power assets.
Sa ceremonial signing, ginpahayag man it Pangueo nga kinahangean it pagbueoligan it NICA ag NGCP para maiayos ro mekanismo para sa cybersecurity ag intelligence-driven analysis nga pagagamiton sa padayon nga distribusyon it kuryente sa mga komunidad.
Kaparte man raya it pagprotekta sa nasyon maghalin sa mga hangkat sa power transmission system nga sambilog mang isyu sa patag it seguridad.
Sa idaeom it MOU, ro NICA hay may responsibilidad nga tipunon ro mga nakolektang impormasyon base sa intel report maghalin sa nagkaeain-eain nga instrumentalidad it gobyerno, maghimu it imbestigasyon, magcollate it data, ag magrekomenda it mga aksiyon partikular sa pagdahan sa mga asset it transmission it NGCP.
Sa pamaagi it MOU, nagpromisa ro NICA nga igatugyan sa NGCP ro natipon nga intel report para suportahan ro proteksyon it mga power transmission asset nga ginapadaeagan ag pabilin it NGCP sa bilog nga nasyon.
