KALIBO, Aklan—Suportado it makabayan bloc ro House Bill No. 77 ukon ro Human Rights Defenders’ Protection Bill nga ginaduso ni Albay Representative Edcel Lagman.
Raya hay matapos nga nakitaan it tumaeagsahon nga function sa oras nga maging laye.
Suno kay Alliance of Concerned Teachers ukon ACT Partylist representative France Castro, may kakaiba nga function ro nasambit nga hagna ag sa kamatuoran sigon hay may nauna eon sanda nga ginproponer nga kaparehong hagna ko 18th Congress apang nakueangan sa tyempo rason nga uwa nakaabot sa senado.
Ginsuportahan nanda ro ginduso it kongresista bangud gusto man nanda nga makaangkon it taga-protekta ag taga-depensa sa tawhanong kinamatarong.
Ginpamalibaran man nana ro mga nagaguwa nga isyu nga magapabor raya sa progresibong grupo bangud nga magapangatubang gihapon sa natungdan nga korte ro mga tawong maga-eabag sa mga naga-iral nga laye sa nasyon.
Madumduman nga nagapamaeabag ro National Task Force to End Local Communist Armed Conflict (NTF-ELCAC) sa nasambit hagna bangud nga nagapati sanda nga engkasong maipasa raya hay magasalungat sa pilang mga naisalaye eon kaparehas it Anti-Terrorism Act, Anti-Money Laundering Law ag ro Terrorism Financing Prevention and Suppression Act.
Nasayuran nga ginatumod sigon sa House Bill No. 77 nga ro “human rights defenders” hay ro sin-o mang indibidwal ukon asosasyon nga gustong proteksyonan ro kinamatarong it sangka tawo mapa local, national, regional ag international level man.
Ginatuyo dugang it proposisyong laye ro pagrespeto sa mga human rights defenders.
Ro ano mang pamaeag, pag label kaparehas it “communist” “terrorist” ukon “enemies of the state” sa mga human rights defenders hay ginapunggan it nasambit nga hagna.
