Dead on arrival sa Aklan provincial hospital ro sangka 38 anyos nga eaeaki matapos nga maeomos sa Aklan river nga sakop it Brgy. Cupang, Banga.
Ginkilaea ro biktima nga si Ronnie Andrade ag residente it Brgy. Aranas sa banwa it Balete.
Suno kay acting punong barangay Sonny Teodosio it nasambit nga lugar nga base sa andang pagpangusisa hay dayo ro biktima sa lugar kon sa siin nagapamintura sigon raya sa ginaobra nga baeay.
Kaibahan ro daywang iba pa hay nag-adto sanda sa suba ag nagpaligos kon sa siin nagpaanod sigon ro biktima sa anang kaugalingon sa tubi.
Ginpahayag dugang ni Teodosio nga posibleng uwa nataeopangdan ni Andrade nga madaeom eon ro porsyon nga anang naeoksuhan ag uwa nana nasarangan pa nga makabalik it uman sa pag-eangoy.
Padumdom man ni kapitan Teodosio sa mga nagadayo sa andang lugar nga magkutana anay sa mga nakasayod nga residente kon pwede paligsan ro suba nga andang pagapwestuhan.
Samtang sa pihak nga parte, ginpahayag ni Rolando Diaz it Municipal Disaster Risk Reduction Management Office ukon MDRRMO Banga nga masobra sa sang oras antes nga nakit-an ro biktima.
Una pa eamang sigon kara hay positibo imaw nga uwa pa nakahalin sa gin-eoksuhan nga porsyon it suba si Andrade bangud nga nagalilo ro current it tubi.
Apang, ana gihapon nga gin-abisuhan ro mga kaeapit nga emergency response unit agud nga mamonitor ag mabantayan ro posibleng paga-anuran sa biktima.
Nadaea pa sa ospital si Andrade apang gindeklara it doktor nga binawian eon raya it hueam nga kinabuhi.
