Owa eon it kabuhi kat nasapwan bandang alas-6:25 kabi-e ro sangka 51-anyos nga eaeaki nga nagahamyangon sa may barangay Sibalew sa banwa it Banga.
Ginkilaea ro biktima kay Jhonny Zonio ag residente it nasambit nga lugar.
Sandig sa imbestigasyon it Banga Municipal Police Station nga naghatod pa kahapon bandang alas-12 it truadlaw ro biktima it ilabas sa anang asawa.
Apang nangawa eon lang ro misis kara kat pag-uli nana kabi-e hay sarado ro iwag it andang panimaeay ag owa it tawo.
Gin-usoy sigon kara ro anang asawa ag nasapwan eon lang nana sa unahan it andang panimaeay nga nagahamyangon ag owa eon it kabuhi.
Ginasugid nga kaiping ni Zonio ro sangka pangkuryente nga gamit sa pagpanikop it isda nga ginapatihan gintunaan it anang kamatayon.
Angot kara, kumpiyansa man ro pamilya ni Zonio nga owa it foul play sa anang pagkamatay.
Sa pihak kara, igapaidaeom sa gihapon it Banga PNP ro anang bangkay sa autopsy agud nga matumod ro rason it anang kamatayon.
