Ginpa-eksplekar makaron it Philippine National Police si dating Negros Oriental Governor Pryde Henry Teves matapos nga makarekober ro mga otoridad it mga mabug-at nga ebidensya sa tunga it nagapadayon nga search warrant nga ginapatigayon it mga raya sa property ni Henry Teves.
Ginkumpirma ni PNP spokesperson PCol. Jean Fajardo nga nabue-an it mga litrato it pamilya Degamo ag sketch it mapa ag ruta paagto sa panimaeay it gobernador sa Pamplona, Negros Oriental ro sambilog sa mga naarestong suspect it mga pulis sa ginkasang search warrant it PNP-CIDG ag SITG PRO7 sa HDJ Tolong Compound nga ginapanag-iyahan ni Pryde Henry Teves.
Ro suspect hay ginkilaea it pulisya nga si Negil Electona nga nagaserbing chief security sa HDJ Compound, ag dating pulis nga nasibak sa serbisyo sa ranggong Patrolman ko dag-on 2017 bangud sa pagkaeakot sa paggamit it ilegal nga droga.
Suno kay Fajardo, sandig sa report nga nabaton it National Headquarters maghalin sa mga ebidensya ngara hay kumpiyansa makaron ro Pambansang Pulisya nga mabahoe ro naging partisipasyon ni Electona sa karumaldumal nga pagpatay kay governor Degamo ag 8 iba pa.
Angot kara, ginklaro man ni Fajardo nga ro mga ebidensyang andang ginapahayag kapareho it litrato it pamilya Degamo ag mapa it panimaeay kara sa naboue maghalin kay Electona hay narekober sa seperado nga operasyon.
Mag-eowas kara nagapadayon pa imbestigasyon kay Pryde Henry Teves ag ginsikyar man it SITG PRO7 sa seperado nga operasyon ro mga panimaeay it mga suspect kung siin narekober ro nasambit nga mabug-at nga ebidensya
