Nagpaguwa it kaeain it buot si Aklan 2nd District Rep. Teodorico Haresco Jr. sa direktang pagsumite it position paper it lokal nga gobyerno it malay sa chairman it committee on economic affairs it manabang kapueuongan it kongreso angot sa andang sentimiento nga indi eon i-eakot ro barangay caticlan ag isla it boracay sa ginaduso nga West Aklan Special Economic Zone Authority ukon WASEZA.
Suno kay Cong. Haresco nga medyu ginbalewala imaw it LGU-Malay sa pihak nga may nauna eon sanda nga inistoryahan ni mayor frolibar bautista kun sa siin ginpromisa it kongresista nga indi igapilit kon owa naila ro caticlan ag boracay nga maeakot sa WASEZA.
Ginkwestiyon man kara ro position paper nga owa sigon ginpaagi kana sa pihak nga imaw ro representante it ikaywang distrito it probinsiya.
Mas mayad pa suno kana ro sangguniang panlalawigan nga gintaw-an it kopya , kun sa siin insigida man nga nagpaguwa it andang resolution of support.
Matsa kueang suno kana sa pagsalig , good manners and right conduct ukon GMRC ag pagrespeto ro naging tikang it LGU-Malay ag provincial board.
Samtang, ginklaru pa kara nga magkaiba ro anang ginaduso nga WASEZA ag ro Boracay Island Development Authority ukon BIDA Bill.
