Sa pihak nga Islam ro pinakamabahoe nga relihiyon sa Indonesia, apang suportado it gobyerno ro pagpatigayon it mga aktibidadis it mga katoliko nga may kaangtanan sa Semana Santa.
Suno kay Bombo International Correspondent Jenavela Limpin Cumla it Jakarta, Indonesia nga kada dag-on hay linibu nga mga pilgrims ro nagadagsa sa Larantuka, sangka banwa sa nasidlangan nga parte it isla it Flores para sa Semana Santa ukon Holy Week festival.
Bangud kara, gindeklara sigon it gobyerno idtu ro event nga sangka national religious tourism destination.
Nagahalin ro mga tawo sa nagkaeain-eain nga rehiyon it Indonesia.
Kaeabanan sa makarondaya nga tiempo hay fully booked ro mga hotels samtang ro iba pang mga pilgrims hay naga-renta it kwarto sa mga residente.
Ginpahayag ni Cumla nga ro Flores hay sangka Catholic-majority island.
Kada Miyerkules Santo sigon hay ginasaraduhan ro mga nagapangunang karsadahon sa lugar agud nga makaangkon it prayerful ambiance.
Kada Huwebes Santo ro mga pilgrims hay nagabisita sa tatlong nagkaeain-eain nga chapels kun sa siin makita ro estatwa ni Blessed Mother, Baby Jesus ag Jesus nga kaibahan sa ginapatigayon nga traditional procession pagka-Biyernes Santo.
Ginasakay ro mga raya sa kanya-kanyang baroto para sa sea procession sa agahon ag nagatabu sanda sa sangka lugar.
Sa pihak nga parte, maskin ro mga local muslims sigon hay nagapasakop sa raya nga event.
Samtang, sa Yogyakarta, sangka simbahan nga kaatubang ro sangka moske hay ginadayo it mga katoliko ag non-catholics bangud sa ginasugid nga milagrosong busay nga nagahalin sa mabahoe nga grotto ni Birhen Maria .
