Waea-tuo eon ro mga nagabaligya it mga lukay sa guwa it mga catholic churches partikular sa may St.John The Baptist Cathedral kasunod it selebrasyon makaron nga adlaw it Palm Sunday ukon adlaw it lukay bilang pagsueod ni Hesus sa Jerusalem.
Agahon paeang hay timprano eon nga nagplastar ro mga manugbaligya it lukay sa guwa it simbahan.
Suno kay Cedy Placida, sangka lukay vendor maghalin sa barangay Bakhaw Sur, Kalibo nga Biyernes paeang it gabi-e hay nag-umpisa eon ro andang paghimo it mga lukay.
Ginaeauman sigon nanda nga magadagsa ro mga tawo makaron nga adlaw rason nga sigidas sa gihapon ro andang paghimo it mga lukay samtang nagabaligya.
Raya hay matapos ro kapin sa daywang dag-on nga temporaryong pagpaiway sa pilang ka mga aktibidad may kaangtanan sa Semana Santa bangud sa pandemya.
Angot kara, nagabalor man it P20 pesos ro presyo it lukay nga may nagkaeain-eain nga desinyo.
Samtang, ginpasiguro man it mga manugbaligya sa mga tumueu-o nga indi makahingabot sa unang misa nga una sanda sa andang mga pwesto hasta it last mass makaron nga adlaw it Dominggo
