Ginabawae sa isla it Boracay ro anumang aktibidad ukon events nga nagakriar it sangag umpisa alas-6:00 it agahon it biyernes santo, Abril 7 ag magatapos it alas-6:00 man it agahon it black Saturday, Abril 8.
Suno kay Dennis T. Briones OIC – Business Permits and Licensing Office it LGU Malay nga raya hay agud nga taw-an it kahigayunan ro tanan nga mga residente, bisita, turista ag bakasyunista nga makapamaeandong sa mga naging kasakit, sakripisyo ag kamatayon ni HesuKristo.
Ro nasambit nga mandato hay sandig sa Sangguniang Bayan Resolution No. 015, series of 2009 ag kasunod kara ro Memorandum Order No. 2023-043 kon sa siin inde magatao ro LGU Malay it special permit para sa mga party sa isla it Boracay sa Byernes Santo.
Ginpahayag dugang ni Briones nga kapin sa 12 anyos eon raya nga ginapatuman it LGU bilang pag-obserba ag pag-iba sa kristyanong katilingban sa selebrasyon it Semana Santa kon sa siin ginataw-an it kahueogan ag importansya ro paghaead ni Ginoong Hesukristo sa anang kaugalingon agud nga maeowas kita sa kalibutanong kasae-anan.
Nasayuran nga haeos tanan hay mas ginapili nga sa isla it Boracay i-spend ro holy week bangud sa kainit it panyempo kamana man sa mahabang bakasyon nga uwa it opisina sa tanan nga ahensya it gobyerno ag maging uwa man it klase sa pribado ag pampublikong eskwelahan.
