Ginbulgar ni Special Task Force Degamo Chairperson ag Department of the Interior and Local Goverment Secretary Benjamin Abalos Jr. nga ginhana pang sunugon ro pila sa mga ebidensyang may kaangtanan sa pilang mga suspek nga may direktang partisipasyon sa pagpatay kay dating Negros Oriental governor Roel Degamo ag waeong iba pa.
Raya ro ginpahayag ni Abalos kasunod it pag-anunsyo nana sa pag-aresto sa sambilog sa gina-alegar nga utok sigon sa likod it nasambit nga krimen nga ginkilaea kay Marvin Halaman Miranda.
Narekober it mga otoridad ro pilang sunog nga parte it mga eambong , ag wallet nga may kaibahang mga identification cards it daywa sa suspek nga ginkilaeang sanday Judel Rojas Rivero ukon alyas Osmundo Rojas Rivero, ag Joven Javier nga parehong una sa kustodiya eon makaron it National Bureau of Investigation.
Ro nasambit nga mga ebidensya hay gin-eubong pa it mga suspek sa idaeom it eugta nga may daeom nga 10 feet sa bahin it compound nga ginapanag-iyahan ni Pryde Henry Teves kaeakip ro pilang matag-as nga kalibre it mga armas ag granada nga nakutkot man it mga otoridad sa nasambit nga lugar.
Kung madumduman, sangka search warrant ro ginkasa it mga otoridad sa compound ni Pryde Henry Teves umpisa ko Marso 23 hasta Marso 31, 2023 alinsunod sa sangka court order nga ginpaguwa it regional trial court Mandaue City.
Angot kara, nagpahayag man it kumpiyansa si Abalos nga sa pamaagi it tanan nga mga ebidensyang andang nakolekta ag buyot eon makaron hay nagapatimaan nga una sa andang panig ro madali eon lang nga pag-angkon it hustisya para sa mga biktima ag mga naaywang pamilya it mga raya bangud sa nasambit nga karumaldumal nga krimen
