Sangka ina ag anang daywang unga kara nga babaye nga parehong teen-ager ro gina-alegar nga gin-sinapian it maeain nga espiritu sa sueod it gina-istaran nga baeay sa Sampaguita Road, Barangay Andagao, Kalibo.
Base sa report, gabi-i it Lunes Santo kat gulpi eon lang nga nagasinggitan ag nagawala ro mga pamatan-on nga naga-edad it 13 ag 16 rason nga nag-agto kanda ro mga kaeapitbaeay ag pilang opisyal it barangay.
Mag-eowas sa pagsinggitan ag pagwala, kun sa siin may bitbit pang kutsilyo ro mga raya ag ginapangbasag ro mga gamit nga mabuytan, medyu nagapaeanig-a man ro eawas it mga raya rason nga ginpakamayad nga magtawag it pari nga mayad sa exorcism.
Gindaea ro mga raya sa St. John The Baptist Cathedral ag ginpangamuyuan it exorcist nga si Fr. Tudd Belandres, ro kora paroko it nasambit nga simbahan.
Pilang minuto eamang ro nagtaliwan hay kumalma ro mga unga ag nakaangkon it alintro.
Apang, pagka-gabi-i, ro andang 49-anyos nga ina man ro gina-alegar nga sinapian.
Gulpi eamang nga nagaturong ro anang mga mata ag indi maka-istorya it maayos.
Ginasugid nga bangud sa amiga sigon it teen-ager nga may third eye rason nga madali nga ginapaeapitan it nagkaeain-eain nga elemento ag nagakadaeahig ro daywa eabi eon kon gutom ag owa it bastanteng tueog.
Samtang, ginpahayag ni Mrs. Gilda Villanueva, bangud sa natabu , gusto eon nana nga pauli-on ro anang magueang sa Bicol kaibahan ro daywang unga bangud sa nabatyagan nga kahadlok.
Nauna eon nga ginlaygay ni Fr. Belandres nga ugalion ro pagpangamuyo bangud nga ro mga tawo nga kaeabanan nga ginasapian hay owa masyadong nagasimba ag kueang ro pagtuo sa Diyos.
