Gin-insister it grupong Gabriela nga magadugang eamang sa baeayran it mga Pilipinong nagabayad it buwis ro panibag-ong mga Enhanced Defense Cooperation Agreement (EDCA) sites nga planong igatukod sa Pilipinas.
Raya hay ginpahayag it nasambit nga grupo kasunod it anunsyo ni Pangueong Ferdinand “Bongbong” Marcos Jr. sa mga lokasyon it ap-at nga EDCA sites nga itukod sa nasyon.
Gina-insister it grupong Gabriela ro andang pagkontra sa planong dugang nga military operations it Estados Unidos sa Pilipinas.
Ro kasugtanan sigon ngara hay magatao eamang it mas maeapad nga access sa pwersa it Amerika sa mga lokasyon nga owa nagabayad it anumang rental costs sa gobyerno it Pilipinas.
Ginpaathag it grupo nga raya hay nagapatimaan eamang nga magagastos ro publiko sa pagbayad it buwis it tubi, kuryente, ag iba pang operational costs it base militar it EDCA.
Ginpahayag dugang nga ro operasyong militar it mga tropa it Estados Unidos sa nasyon hay bukon man it para sa interes it mamamayang Pilipino kundi para sa interes eamang it Amerika nga mang-engganyo it giyera sa Tsina ag baligyaan ro Pilipinas it sobra-sobrang kagamitang pang giyera.
