Ginpaathag ni Bombo International Correspondent Dr. Reynand Dumala-on, PhD Researcher, The University of Auckland, Auckland Central Business District, New Zealand nga mabahoe ro tyansa nga makaangkon it tornado ukon buhawi kon may mga thunderstorm ukon kilat.
Raya hay kasunod it pagpanaeasa it buhawi sa East Auckland sa nasambit nga nasyon kon sa siin kapin 51 ka mga panimaeay ro nagkaeasamad daea it mabaskog nga hangin partikular sa Golflands paadto sa East Tāmaki, kaeakip eon ro Tamaki Heights, Flatbush ag Huntington Park.
Ginpaathag dugang ni Dr. Dumala-on nga bukon it estable ro temperatura sa nasambit nga nasyon ag bukon it common ro makarundaya nga senaryo it kalamidad.
Posible sigon nga raya hay daea it climate change bangud nga bibihira raya nga nagakatabo sa nasyon.
Suno pa kay Dr. Dumala-on nga ginaagyan man it bagyo ro New Zealand apang uwa naga landfall sa eogta kundi nagatinir eamang raya sa tubi.
Sa makaron sigon ro mga biktima it buhawi hay temporaryong nagdayon sa civic center ag magapabilin ro mga raya sa nasambit nga lugar hasta nga maayos ro andang panimaeay.
Ro nasambit nga insidente hay nagtuga it trauma sa mga tawo bangud nga bukon raya it common nga nagakatabo sa nasambit nga nasyon.
