Una eon sa paghinakop it pulisya ag nagapangatubang sa nagakaigong kaso ro suspek nga responsable sa pagbuno-patay sa sangka 50 anyos nga eaeaki nga nasapwan eon lang nga uwa it kabuhi sa Brgy. Lupo sa banwa it Altavas.
Suno kay P/Lt. Ryan Batadlan, OIC chief of Police it Altavas Municipal Police Station, ro biktima nga uwa eon ginhingaeanan it pamilya hay residente mismo it nasambit nga lugar.
Nakipag-inuman sigon raya sa anang ibang kasimaryo kaibahan ro suspek nga si Rosel Fojas, sa legal nga edad ag residente it Sitio Hongoton sa nasambit man nga barangay kon sa siin paghalin it andang mga kaibahan hay natabo ro krimen.
Dugang pa ni P/Lt. Batadlan nga lastro sa liog ag tiyan ro naangkon it biktima halin sa alima it suspek gamit ro siyaw nga kapin sa 9 inches ro kahabaon antes imaw nga ginguyod ag ginhueog sa kilid it karsada.
Nakit-an ro bangkay it biktima pagkaagahon bangud sa nakit-an nga dugo sa binit it karsada maeapit man sa anang motor nga nakaparking ag dikara ginsundan nanda ro dugo ag nasapwan ro nagahamyangong nga eawas it biktima.
Ginatan-aw nga motibo sa krimen ro dating tima-tima sa tunga it magtimbang nga parte.
