Bangud sa mabakod nga pagsalig sa Diyos rason nga nakaangkon it kumpiyansa ro bag-ong abogada nga si Atty. Shiela Ang nga maeakip sa mga nakapasar sa 2022 bar exams.
Suno kana nga antes nga ginpaguwa it korte suprema kahapon ro resulta it eksaminasyon hay ginpakamayad nana nga mag-isaeahanon agud nga pahauman kon anuman ro anang kapalaran.
Eubus suno kana ro anang kalipay ag napa-euha man imaw kat masayuran nga sambilog imaw sa pasado.
Nagbunga sigon ro anang kalisod sa law school , kun sa siin, haeos siyam nga dag-on antes imaw nga nakatapos bangud sa pagiging ina sa daywang ka unga nga makaron hay naga edad it 10 ag 6 nga dag-on.
Mag-eowas kara, kabulig man imaw sa pag asikaso sa andang negosyo.
Imaw suno kana ro kauna-unahan nga naging abogado sa andang pamilya.
Ro pagiging abogada hay childhood dream nana nga makaron hay nataw-an it katumanan.
Si Atty. Ang hay tubong Manila, apang nakapangasawa it taga-Tigayon , Kalibo nga naging kaklase nana sa kolehiyo sa kursong business management.
Laygay nana sa mga estudyante nga kon pursigido sa sangka bagay, mag-eowas sa pagsalig sa Diyos, importante nga makaangkon it time management ag commitment sa pagtu-on.
Nasayuran nga 3,992 nga mga examinee ro nakapasar kun sa siin ro rate it nakapasar sa makaron nga dag-on nga 43.47% hay mas manaba kumpara sa record high nga 72.28% passing rate ko 2020-2021 Bar exams.
Bukas sigon imaw nga magtrabaho sa gobyerno ukon pribadong kompaniya kamana man ro pagtukod it law office.
Si Atty. Ang hay nagtapos it law sa Aklan Catholic College ag may masters degree man .
