May halong kasadya ag pagkadismaya ro reaksyon it mga nagrekalmo matapos imponeran it suspesyon sanday Punong barangay Risa Relojo ag Brgy Kagawad Lyzette Reposar it Cupang, Banga bangud sa ginapangatubang nga administrative case no. 2022-002.
Suno kay Brgy. Kagawad Emily Rentino, masadya sanda matapos maangkon ro ginahueat nga mahaba-habang hustisya bangud sa paggamit it pondo it barangay para sa personal nga kinahang-eanon.
Apang, dismayado sigon sanda matapos nga uwa napamatian ro hinyo nga imponeran it administrative ag criminal case ro daywang opisyal.
Madumduman nga ginsuspinde it haeos an-om nga buean si Relojo, samtang daywang buean man kay Reposar bangud sa negligence of duty.
Ro daywa hay temporaryong inde makabaton it andang honorarium.
Nag-ugat ro nasambit nga isyu ko december 2021 kat nag-bounce ro cheke para sa disconnection it streetlights.
Haeos 900,000 sigon ro naduea sa pondo it barangay.
Magabalik si Relojo sa October 13, samtang magabalik sa july 13 si Reposar.
